«Sautgempton» yetakchilaridan biri Jeyms Uord-Prouzning zarbalari - APL darvozabonlari uchun haqiqiy bosh og‘rig‘i.
Diqqat qiling, kamtarin jamoa vakili 18 fevral kuni Londonda «Chelsi»ga qarshi kechgan APL 24-turi doirasidagi o‘yinda chempionat hisobidan jarima zarbasini 17-marta golga aylantirdi. 45+1-daqiqada urilgan shu gol yakunda «Sautgemton»ga o‘ta muhim g‘alaba tortiq etganini alohida aytish joiz.
***
Jeyms Uord-Prouz endi APLda jarima zarbalaridan gol urish bo‘yicha birgina afsonaviy Devid Bekxemdan ortda qolmoqda. Yana 1ta «standart» gol uni bu borada Angliya chempionatida «qirol»ga aylantiradi. Taqqoslash uchun keltirsak, Krishtianu Ronaldu APLdagi faoliyati davomida jarima nuqtasidan «atigi» 12ta gol hosil qilgan.
***
Jeyms APLda jarima zarbasidan ilk marta 2013 yilning noyabr oyida foydalangan. O‘sha vaqtdan keyingi davrni olsak, Yevropaning kuchli 5ta ligasida birgina Lionel Messi ko‘proq «standart» gol to‘pladi - 31ta. Lekin bunda bitta jihatni e’tiborga olish kerak: argentinalik yuzduz shundan buyon 333 marta jarima zarbasi tepgan bo‘lsa, Uord-Prouz atigi 112ta urinishga ega bo‘ldi. Qisqasi, angliyalik futbolchi jarima zarbalaridan foydalanish foizi bo‘yicha hattoki, Leodan ham oldinda. Oddiy aytganda, samaradorlik koeffisiyenti Jeymsda 15,2 foizga teng, Messida esa 9,3 foiz, xolos.
***
Klub afsonasi. Ha, Uord-Prouz «Sautgempton»ning shunchaki, oddiy sardori emas. U klub safiga 2011 yili qo‘shilgan va ortda qolgan davrda APLning o‘zida 330ta o‘yin o‘tkazib, 46ta gol urgan. Demak, Jeymsni bemalol «Sautgempton» afsonasi sifatida ta’riflash mumkin.
P.S.: barcha statistik raqamlar 1 mart kuni holati bo‘yicha keltirilgan.
