«Metallurg» va «Qizilqum» shu kungacha elitada 46 marta kuch sinashgan: uning 16 tasi «Metallurg», 18 tasida «Qizilqum» g‘alaba qozongan, 12 ta uchrashuvda kuchlar teng kelgan. Kiritilgan va o‘tkazib yuborilgan to‘plar farqi 61:59, vohaliklar foydasiga. «Metallurg» bu raqibini ikki marta 4:1 hisobida dog‘da qoldirgan (2006, 2019). «Qizilqum» esa bitta uchrashuvda javobsiz beshta to‘p (0:5, 2006) kiritgan.
Ushbu jamoalarning Bekobodda bo‘lib o‘tgan 23 ta uchrashuvidan 11 tasida maydon egalari g‘alaba qozongan, 6 ta uchrashuvda durangga imzo chekilgan. 6 ta o‘yinda mehmonlar zafar quchgan. Bu uchrashuvlarda «Metallurg» raqiblari darvozasiga 40 ta gol kiritib, o‘z darvozasidan 26 ta to‘p o‘tkazib yuborgan.
Bekobodda so‘nggi beshta uchrashuvda qayd etilgan natija:
06.05.2022 Metallurg – Qizilqum – 1:1
01.08.2021 Metallurg – Qizilqum – 1:2
22.08.2020 Metallurg – Qizilqum – 1:2
12.04.2019 Metallurg – Qizilqum – 4:1
12.08.2018 Metallurg – Qizilqum – 2:1
«Qizilqum» haqida
Navoiyning "Qizilqum" jamoasiga 1974 yilda asos solingan. Dastavval jamoa Zarafshon shahrida «Progress» nomi bilan faoliyat yuritgan. Mamlakat mustaqilligiga qadar jamoa viloyat, respublika birinchiligi hamda sobiq Ittifoq chempionati ikkinchi ligasida o‘ynagan. 1992 yilda O‘zbekiston birinchiligida qatnashib kelgan jamoa 1999 yili quyi ligada 3-o‘rinni egalladi va oliy ligaga yo‘llanmani qo‘lga kiritdi. 1994 yildan «Qizilqum» nomi bilan yuritib kelinayotgan jamoa oliy ligadagi uchinchi mavsumida eng yuqori natijasini qayd etdi, ya’ni bronza medaliga sazovor bo‘ldi.
Bugungacha navoiyliklar kuchlilar safida 662 ta uchrashuv o‘tkazib, shulardan 235 tasida g‘alaba qozongan, 144 o‘yinda durangga erishgan, 283 o‘yinda esa imkoniyatni boy bergan. Kiritilgan va o‘tkazib yuborilgan to‘plar farqi – 803:950.
«Qizilqum» jamoasining oliy ligadagi eng yirik g‘alabasi – 7:0 (2003 yil, «Guliston»), eng yirik mag‘lubiyati – 0:11 (2007 yil, «Paxtakor») tashkil etadi.
