Bugun O‘zbekiston Milliy Olimpiya qo‘mitasining majlislar zalida Qo‘mitaning 2022 yilgi faoliyati yuzasidan matbuot anjumani tashkil etildi.
Tadbirda MOQ Bosh kotibi Oybek Kasimov mavzu yuzasidan hisobot berib, Qo‘mitaning yaqin rejalari xususida to‘xtalib o‘tdi.
Oybek Omilovich dastavval, o‘tgan yili bo‘lib o‘tgan Pekin-2022 qishki Olimpiya o‘yinlari, Vladivostok-2022 Osiyo bolalari o‘yinlari, Konya-2021 Islom birdamligi o‘yinlarida O‘zbekiston delegasiyasining ishtiroki, unda sportchilarimiz qayd etgan natija xususida gapirdi.
Shundan so‘ng, Yoshlar siyosati va sport vazirligi bilan hamkorlikda terma jamoalarning Osiyo va jahon chempionatlaridagi ishtirokini ta’minlash, Prezidentimiz ilgari surayotgan sog‘lom turmush tarzi va Olimpizmning ezgu g‘oyalari targ‘ibotini yanada kuchaytirish bo‘yicha olib borilayotgan ishlar haqida ma’lumot berdi.