Superliga 4-turidan o‘rin olgan «Qizilqum» – «Nasaf» (1:1) uchrashuvidan so‘ng mehmonlar bosh murabbiyi Ro‘ziqul Berdiyev o‘z fikrlarini bildirib o‘tdi.

“Raqib bugun birgina vaziyat yaratdi, biz esa ko‘proq. Bugun faqat g‘alaba uchun maydonga tushgan edik, afsuski, ikki ochko yo‘qotdik. O‘yin nazorati to‘la qo‘limizda edi va shu sabab natija alamli bo‘ldi. Ba’zan terma jamoa yig‘inidan so‘ng o‘yinimizda pasayish kuzatiladi. Bu narsa o‘tgan mavsum ham kuzatilgan edi. Himoyachilarning qo‘pol xatosi sabab Kenjaboyev uch futbolchimizdan o‘tib, gol kiritdi. «Qizilqum» tarkibida qarshi hujumlarda tezkor harakat qiladigan futbolchilar bor ekanligini shogirdlarimga ta’kidlagan edim. Ammo, aynan shu jihat orqali baribir jazolandik.

Aliqulovning hujumga o‘tishi – biz uchun zaxira varianti sanaladi. Uning ikkinchi qavatda, hujumda yaxshi harakat qilishini bilamiz. Shu sabab, tavakkal qilib uni hujumga chiqaryapmiz va bu o‘zini oqlab kelmoqda. U terma jamoada ham himoyada o‘ynaydi va aslida Aliqulovni hujumda sinash noto‘g‘ri”, – dedi Berdiyev.