Суперлига 4-туридан ўрин олган «Қизилқум» – «Насаф» (1:1) учрашувидан сўнг меҳмонлар бош мураббийи Рўзиқул Бердиев ўз фикрларини билдириб ўтди.

“Рақиб бугун биргина вазият яратди, биз эса кўпроқ. Бугун фақат ғалаба учун майдонга тушган эдик, афсуски, икки очко йўқотдик. Ўйин назорати тўла қўлимизда эди ва шу сабаб натижа аламли бўлди. Баъзан терма жамоа йиғинидан сўнг ўйинимизда пасайиш кузатилади. Бу нарса ўтган мавсум ҳам кузатилган эди. Ҳимоячиларнинг қўпол хатоси сабаб Кенжабоев уч футболчимиздан ўтиб, гол киритди. «Қизилқум» таркибида қарши ҳужумларда тезкор ҳаракат қиладиган футболчилар бор эканлигини шогирдларимга таъкидлаган эдим. Аммо, айнан шу жиҳат орқали барибир жазоландик.

Алиқуловнинг ҳужумга ўтиши – биз учун захира варианти саналади. Унинг иккинчи қаватда, ҳужумда яхши ҳаракат қилишини биламиз. Шу сабаб, таваккал қилиб уни ҳужумга чиқаряпмиз ва бу ўзини оқлаб келмоқда. У терма жамоада ҳам ҳимояда ўйнайди ва аслида Алиқуловни ҳужумда синаш нотўғри”, – деди Бердиев.