«Барселона» «Манчестер Сити» яримҳимоячиси Родри Эрнандесни ўз сафига қўшиб олиш учун навбатдаги таклиф билан чиққан.

Хабарларга кўра, Каталония клуби 30 ёшли футболчи учун 60 млн евро кафолатланган сумма ва яна 10 млн еврогача бонуслар таклиф қилмоқда. Шу тариқа, келишувнинг умумий қиймати 70 млн еврога етиши мумкин.

Манбаларнинг ёзишича, бу «Барселона»нинг Родри бўйича учинчи ва якуний таклифи бўлиши кутилмоқда. Каталония клуби аввалги таклифлари рад этилганидан сўнг, музокараларни 60 млн евро ва 10 млн евролик бонуслар кўзда тутилган янги таклиф билан якунлашга уринмоқда.

Шу билан бирга, Англия матбуотида «Манчестер Сити» Родри учун бундан юқорироқ сумма талаб қилаётгани ҳақида хабарлар тарқалган. Хусусан, инглиз клуби футболчини қўйиб юбориш учун тахминан 70 млн фунт талаб қилаётгани айтилмоқда.

Transfermarkt маълумотларига кўра, Родри Эрнандеснинг айни пайтдаги бозор қиймати 55 млн еврога баҳоланган. Испаниялик таянч яримҳимоячиси 30 ёшда бўлиб, унинг «Манчестер Сити» билан амалдаги шартномаси 2027 йил 30 июнгача мўлжалланган.

Родри «Манчестер Сити» сафига 2019 йил ёзида «Атлетико»дан келиб қўшилган. Transfermarkt маълумотларига кўра, инглиз клуби ўша пайтда унинг трансфери учун 70 млн евро тўлаган.