Angliya chempionatining 28-turi doirasida qoldirilgan so‘nggi o‘yin bo‘lib o‘tdi. Yevropa ligasi yo‘llanmasi uchun kurash olib borayotgan «Brayton» o‘z maydonida kuchli uchlikka harakat qilayotgan «Manchester Yunayted»ni qabul qildi.

O‘yin boshida Antoni qulay vaziyatda aniq zarba yo‘llay olmagan bo‘lsa, keyinchalik mezbonlar futbolchisi Mitoma ikkita imkoniyatni qo‘ldan chiqardi. Tanaffusga qadar jamolarda yana 1-2 tadan qulay vaziyatlar bo‘ldi, ammo darvozabonlar yaxshi harakat qilishdi.

Ikkinchi bo‘limda esa o‘yin so‘nggiga qadar deyarli xavfli vaziyat bo‘lmadi. O‘yinga qo‘shib berilgan 7-daqiqada esa hakam VAR yordamida "MYU" darvozasiga penalti belgiladi: to‘p Lyuk Shouning qo‘liga tegdi. 90+9-daqiqada esa Makkalister penaltidan unumli foydalanib, "Brayton"ga g‘alabani taqdim etdi.

"Yunayted" ushbu mag‘lubiyat tufayli 4-pog‘onada qoldi. "Brayton" esa o‘z ochkolarini 55 taga yetkazib, jadvalda 6-pog‘onaga ko‘tarilib oldi.

Angliya chempionati, 28-turning qoldirilgan o‘yini
Brayton – Manchester Yunayted 1:0 (0:0, 1:0)
Gol: 1:0 – 90+9, penalti Mak Allister.
Brayton – Stil, Dank, Uebster, Estupinyan, Mak Allister, Gilmor (Koluill, 75), Ensiso, Mitoma, Buonanotte (March, 63), Kaysedo, Uelbek (Undav, 75).
Manchester Yunayted – De Xea, Uan-Bissaka, Shou, Lindelef, Diogu Dalot, Kazemiro, Fred (Zabitser, 76), Brunu Fernandesh, Antoni (Sancho, 76), Marsyal (Vegorst, 84), Reshford.
Ogohlantirishlar: Kazemiro (44), Uebster (52), Diogu Dalot (59), Dank (70), Antoni (70), Koluill (77), Kaysedo (86), Shou (90).