«Tottenxem» APL 32-turida «Nyukasl»ga 1:6 hisobida yutqazdi - sharmandali natija.
E’tiborli tomoni, London klubi o‘yindan so‘ng «Sent-Jeyms Park»ka borgan muxlislarga chipta puli qaytarilishini ma’lum qildi. Bir qarashda, g‘alati, ikkinchi tomondan, o‘rinli qaror! Qiziq, APLning barcha klublari mag‘lubiyatlardan keyin shunday yo‘l tutganida, eng ko‘p to‘lov qay biri chekiga tushardi?
***
Joriy mavsumning eng omadsiz ishtirokchilaridan biri - «Sautgempton» 32-turga qadar 20 marta mag‘lubiyat ko‘chasiga kirdi. Jamoa fanatlari esa salbiy hisob bilan yakunlangan o‘yinlar chiptalari xaridi uchun jami 32,8 million funt sarflashgan. Agar faqat uy uchrashuvlarini hisobga olsak, «avliyolar» 10ta mag‘lubiyat uchun muxlislardan 12 million qarzdorlar. Safardagi 10ta mag‘lubiyat bahosi esa 20 «limon»ga teng, axir yo‘l haqi va boshqa xarajatlar ham bor.
***
«Lester»ning 32ta turdagi 20ta mag‘lubiyati bahosi birozgina pastroq - 31,9 million funt. Aslida «tulkilar» muxlislari 1ta chiptaga o‘rtacha hisobda «Sautgempton» tarafdorlariga nisbatan kamroq sarflashgan, qolaversa, jamoaning mag‘lubiyatli o‘yinlarini ko‘proq kishi kuzatgan. Faqat «Lester» safarda kamroq yutqazgan.
***
«Vest Xem»da 15ta mag‘lubiyat ortidan kattagina qarz (deyarli 25,5 million funt) yuzaga kelardi agarda omadsiz o‘yinlarga kompensasiya joriy qilinganida. Chunonchi, London jamoasining 1ta o‘yinini o‘rtacha hisobda 50 mingdan ko‘p fanat kuzatmoqda, boz ustiga, chipta bahosi ham balandroq.
***
«Everton», «Bornmut», «Nottingem Forest», «Lids», «Vulverxempton» va «Kristal Pelas» jamoalarining esa 20 million funtdan ko‘p to‘lashiga to‘g‘ri kelardi APLda mag‘lubiyat uchun to‘lov tizimi bo‘lganida...
