Osiyo futbol konfederasiyasi Ijroqo‘mi yaqindagina klublar musobaqalari isloh qilinishini ma’qullab, endilikda OFK klublar musobaqalari reytingini hisoblashda ham yangicha yondashuvga o‘tishini ma’lum qilgan edi. Unga ko‘ra, endi reytingni hisoblashda oxirgi 4 yillik emas, balki 8 yillik natijalar inobatga olinadi.

Yangilangan reytingga ko‘ra, O‘zbekiston qit’ada 9-pog‘onaga joylashdi. G‘arb mintaqasida esa Saudiya Arabistoni, Qatar, Eron va BAAdan so‘ng 5-o‘rindan joy oldik.  Bu esa 2024 yildan e’tiboran yangicha formatda o‘tadigan klublar musobaqalari uchun O‘zbekistonga faqatgina 2 ta kvota ajratilishini bildiradi. Ya’ni, 2024/25-mavsumda O‘zbekistondan bitta jamoa qit’aning elit klublar musobaqasida (hozirgi OCHL) va yana bir jamoa ikkinchi darajali klublar musobaqasida (hozirgi OFK kubogi)da ishtirok etadi.

Yaqindagina O‘zPFL bu borada OFKga o‘z munosabatini bildirib, reytingni hisoblashda oxirgi 4 yillik emas, 8 yillik natijalarni inobatga olish bizning oxirgi yillardagi ko‘rsatkichlarimizning salmog‘ini tushirishini ma’lum qilgan edi. OFK esa tashkilot Ijroqo‘mi butun qit’a mamlakatlari manfaatlaridan kelib chiqib, shunday qarorga kelinganini bildirdi.

Ma’lumot uchun, yangicha formatga ko‘ra, a’zo mamlakatlar elit musobaqa uchun endilikda maksimum 3 tagacha yo‘llanmaga olishi mumkin.