O‘zbekiston yoshlar terma jamoasi Argentinada o‘tayotgan U20 jahon chempionatining nimchorak final bosqichiga chiqdi. Ravshan Haydarov shogirdlari guruh bosqichining so‘nggi turida Gvatemalaga qarshi maydonga chiqib, ishonchli g‘alabani qo‘lga kiritdi.

Murabbiy avvalgi o‘yinlarga qaraganda bu safar tarkibda 4 ta o‘zgarishni qildi va bu o‘z samarasini berdi. Ayniqsa, hujum chizig‘iga tushirilgan Shahzodbek Ne’matjonov ishonchni oqladi. Uchrashuvning 9-daqiqasida "Metallurg" forvardi raqib himoyachisining xatosidan so‘ng hisobni ochishga muvaffaq bo‘ldi.

Bahsning 21-daqiqasida Shahzodning o‘zi raqib darvozasiga ikkinchi to‘pni kiritdi. Fayzullayevning ajoyib uzatmasidan keyin Ne’matjonov darvozabon bilan yakkama-yakka vaziyatga chiqib ketib, imkoniyatdan unumli foydalandi.

Haydarov ikkinchi bo‘limda ham o‘zgarishlarni amalga oshirdi. Fayzullayevning o‘rniga tushgan Nodir Abdurazzoqov ikki vaziyatda o‘zini ko‘rsatdi. Dastlab uning zarbasidan so‘ng to‘p ustunga tegib qaytgan bo‘lsa, o‘yin so‘ngida Nodir uchinchi golni urgandi. Ammo VAR kuzatuvidan keyin kichik ofsayd qayd etildi va gol bekor qilindi.

Narigi o‘yinda Argentina Yangi Zelandiya ustidan 5:0 hisobida g‘alaba qozondi. Natijada O‘zbekiston U20 terma jamoasi "A" guruhida 2-o‘rin bilan pley-offga chiqdi.

U20 JCH. "A" guruhi, 3-tur
O‘zbekiston U-20 — Gvatemala U-20 2:0
Gollar: 1:0 — 9 Shahzod Ne’matjonov, 2:0 — 21 Shahzod Ne’matjonov.
O‘zbekiston U20: 12. Asrorbek Kenjayev, 3. Abduqodir Husanov, 4. Abubakir Ashurov, 6. Jahongir O‘rozov, 8. Behruzbek Asqarov (15. Diyorbek Ortiqboyev, 65), 9. Shahzod Ne’matjonov (17. Nodirbek Abdurazzoqov, 71), 10. Umarali Rahmonaliyev, 11. Sherzod Esanov, 13. Zafarmurod Abdirahmatov (2. Izzatillo Po‘latov, 82), 14. Abbos Fayzullayev (7. Po‘latxo‘ja Xoldorxonov, 46), 20. Mahmudjon Mahamadjonov (18. Saidafzalxon Ahrorov, 65).
Gvatemala U-20: 12. Xorxe Moreno, 2. Rendall Korado, 5. Arian Resinos, 7. Daniel Kardoza, 8. Nestor Kabrera, 9. Jeffri Battes, 10. Arximides Ordones (19. Anderson Villagran, 46), 14. Jonatan Franko, 16. Ieshua Urizar, 18. Eddi Palensiya (11. Rudi Munos, 65), 20. Figu Motano.
Ogohlantirishlar: Behruzbek Asqarov (5), Umarali Rahmonaliyev (39), Sherzod Esanov (58), Ieshua Urizar (75), Po‘latxo‘ja Xoldorxonov (90+2).