Bundan 6 yilcha muqaddam futbolchilar maoshi borasida to‘liq ma’lumot beruvchi ishonchli (to‘g‘ri, norasmiy) manba - Capology agregatori ishga tushgandi. Endilikda hattoki, FBRef kabi jiddiy moliyaviy statistika saytlari ham ushbu manba ma’lumotlari asosida ish yuritmoqda. Avgust oyida esa Capology va FBRef o‘zaro hamkorlikni yo‘lga qo‘ydi. Capology insayderlar tarmog‘i ma’lumotlariga tayanadi. Aniqrog‘i, agar kamida ikki insayd tomonidan berilgan raqamlar bir-biriga mos tushsa, bu rasman e’lon qilinadi. Qisqasi, ikki manba ma’lumoti asosida maoshi tasdiqlangan futbolchi grafasida yashil belgi paydo bo‘ladi. Aytish joiz, Capology reytingida yuqori o‘rinlarda borayotgan deyarli barcha futbolchilar moyanasi shu formula bo‘yicha tasdiqlangan. Sayt boshqa holatlarda algoritmlarni ishga tushiradi (bunda kamida 20ta o‘zgaruvchan ma’lumotdan foydalaniladi va yuzaga keladigan raqam chindan ham, ishonchli ko‘rinadi). Quyidagi maqolada Capology ma’lumotlari asosida Yevropaning kuchli 5ta ligasida eng ko‘p maoshga ega futbolchilar reytingini shakllantirildi. Xo‘sh, unda qanday e’tiborli jihatlar bor?
** Top-100 shaklidagi reytingda eng ko‘p vakil APLdan - 44 nafar futbolchi. Lekin ikkinchi tomondan, eng katta maoshga ega 10 nafar futbolchi orasida Angliya chempionatining atigi ikki nafar ishtirokchisi bor - Kevin de Bryuyne va Erling Xoland. Boz ustiga, «Manchester Siti» yetakchilari ham top-10ga so‘nggi pallada kirishdi. To‘g‘rirog‘i, Jerar Pike («Barselona»)ning faoliyatini yakunlagani va Serxio Ramosning «PSJ» bilan maosh miqdori pasaytirilgan shartnoma tuzgani evaziga.
** Reytingda eng kam vakil «A» seriyadan - 9 nafar futbolchi. Qolaversa, shuncha o‘yinchidan ikkisi aslida boshqa chempionatlar klublariga tegishlidir. Gap transfer huquqi bo‘yicha «Chelsi» hamda «Barselona» ixtiyoridagi Romelu Lukaku va Samuel Yumtiti haqida ketmoqda.
** Liga 1 + «PSJ»! Fransiya chempionatining reytingga kirgan 12 nafar vakili Parij klubida o‘ynaydi yoki unga tegishli (Keylor Navas va Mauro Ikardi nazarda tutilmoqda).
** Diqqat qiling, «Barselona»ning 15 nafar futbolchisi eng ko‘p maosh oluvchilar qatorida. «Bavariya»dan esa top-100ga 14 nafar futbolchi qo‘shildi.
** Top-100da atigi 7 nafar darvozabon bor. Eng ko‘p maoshga ega kkiper - bu David de Xea. «MYU»ning ispaniyalik darvozaboni yiliga 22,5 million yevro evaziga o‘ynamoqda. Ammo David yaqin orada o‘z pozisiyasini yo‘qotadi, chunki yangi shartnomaga ko‘ra, kamroq maosh va mukofot puli oladi.
** Yoshlar qatorida eng ko‘p maosh Ansu Fatida - «Barselona»ning 20 yoshli futbolchisi umumiy ro‘yxatning 50-pog‘onasida. Reytingda yoshi katta futbolchilar orasida esa Luka Modrich peshqadam. «Real»ning 37 yoshli legioneri yiliga 21,9 million yevro oladi.
R.IBROHIMOV tayyorladi
