Vadim Agishev hakamlik faoliyatini yakunladi.
Sobiq FIFA referisi, faoliyati davomida yorqin va ijobiy xotiralar qoldirgan taniqli hakamimiz Vadim Agishev Superliganing qoldirilgan 8-turidan o‘rin olgan “Paxtakor” – “Andijon” uchrashuvidan so‘ng hakamlik karyerasini yakunladi. 45 yoshni qarshilash arafasida turgan mutaxassisga o‘yindan so‘ng ikkala jamoa tomonidan hurmat bajo keltirildi va unga to‘n kiydirildi.
Ahamiyatli jihati shundaki, Agishev Superliga o‘yinlarida ishlash soni bo‘yicha faoliyatini davom ettirayotgan hakamlar orasida rekordchi sifatida faoliyatini yakunlamoqda. Uning hisobida O‘zbekiston Oliy chempionatida o‘tkazilgan 162 ta uchrashuv mavjud. Unga eng yaqin ta’qibchi Ilgiz Tantashevning hisobida esa 155 ta Oliy Liga bahslari bor.
Ma’lumot uchun, Vadim Agishev hakamlik faoliyatini 1999-yilning oktabrida Ikkinchi ligada boshlagan.
Oliy Liga (hozirgi Superliga)dagi debyuti esa 2007-yilga to‘g‘ri keladi. Shuningdek, u 2009-13-yillar davomida FIFA referisi sifatida faoliyat olib borgan.
U 2022 yilning O‘zbekistondagi eng yaxshi hakami deb topilgan.