Вадим Агишев ҳакамлик фаолиятини якунлади.

Собиқ ФИФА рефериси, фаолияти давомида ёрқин ва ижобий хотиралар қолдирган таниқли ҳакамимиз Вадим Агишев Суперлиганинг қолдирилган 8-туридан ўрин олган “Пахтакор” – “Андижон” учрашувидан сўнг ҳакамлик карьерасини якунлади. 45 ёшни қаршилаш арафасида турган мутахассисга ўйиндан сўнг иккала жамоа томонидан ҳурмат бажо келтирилди ва унга тўн кийдирилди.

Аҳамиятли жиҳати шундаки, Агишев Суперлига ўйинларида ишлаш сони бўйича фаолиятини давом эттираётган ҳакамлар орасида рекордчи сифатида фаолиятини якунламоқда. Унинг ҳисобида Ўзбекистон Олий чемпионатида ўтказилган 162 та учрашув мавжуд. Унга энг яқин таъқибчи Илгиз Танташевнинг ҳисобида эса 155 та Олий Лига баҳслари бор.

Маълумот учун, Вадим Агишев ҳакамлик фаолиятини 1999-йилнинг октабрида Иккинчи лигада бошлаган.

Олий Лига (ҳозирги Суперлига)даги дебюти эса 2007-йилга тўғри келади. Шунингдек, у 2009-13-йиллар давомида ФИФА рефериси сифатида фаолият олиб борган.

У 2022 йилнинг Ўзбекистондаги энг яхши ҳаками деб топилган.