Belgiyalik futbolchi Eden Azar 32 yoshida faoliyatini yakunladi.

“Ba’zan o‘z-o‘zini eshitish va kerakli lahzada “to‘xta” so‘zini ayta olish lozim. 16 yildan so‘ng va 700 ta o‘yindan keyin professional faoliyatimni yakunlashga qaror qildim.

Orzuimni ro‘yobga chiqara oldim, dunyo bo‘ylab juda ko‘p maydonlarda to‘p surdim. Shu vaqt ichida juda ko‘p yaxshi insonlar bilan, murabbiy va futbolchilar bilan tanishdim.

“Lill”, “Chelsi”, “Real” klublariga o‘z minnatdorchiligimni bildiraman, shuningdek, Belgiya futbol federasiyasiga ham meni terma jamoaga chaqirgani uchun rahmat aytaman.

Endi esa yangi chaqiriqlarga tayyor bo‘lish kerak. Tez orada maydondan tashqarida ko‘rishamiz, do‘stlarim”, — deb yozadi Azar.

Eden professional faoliyatidani 2007 yilda “Lill” safida boshlagan. 2012 yilda esa “Chelsi”ga o‘tgan. 2019 yildan 2023 yilga qadar “Real” sharafini himoya qilgan.

Azar faoliyati davomida 15 ta sovrinni qo‘lga kiritgan. Ikki martadan Angliya va Ispaniya chempionligini qo‘lga kiritgan, shuningdek, bir marta Fransiya chempionatida zafar quchgan. Chempionlar Ligasi va Yevropa Ligasi sovrinlarini ham qo‘lga kiritgan.

Belgiya terma jamoasi safida 126 ta o‘yin o‘tkazgan va JCH—2018 bronza medali sohibiga aylangan.