Бельгиялик футболчи Эден Азар 32 ёшида фаолиятини якунлади.

“Баъзан ўз-ўзини эшитиш ва керакли лаҳзада “тўхта” сўзини айта олиш лозим. 16 йилдан сўнг ва 700 та ўйиндан кейин профессионал фаолиятимни якунлашга қарор қилдим.

Орзуимни рўёбга чиқара олдим, дунё бўйлаб жуда кўп майдонларда тўп сурдим. Шу вақт ичида жуда кўп яхши инсонлар билан, мураббий ва футболчилар билан танишдим.

“Лилль”, “Челси”, “Реал” клубларига ўз миннатдорчилигимни билдираман, шунингдек, Бельгия футбол федерациясига ҳам мени терма жамоага чақиргани учун раҳмат айтаман.

Энди эса янги чақириқларга тайёр бўлиш керак. Тез орада майдондан ташқарида кўришамиз, дўстларим”, — деб ёзади Азар.

Эден профессионал фаолиятидани 2007 йилда “Лилль” сафида бошлаган. 2012 йилда эса “Челси”га ўтган. 2019 йилдан 2023 йилга қадар “Реал” шарафини ҳимоя қилган.

Азар фаолияти давомида 15 та совринни қўлга киритган. Икки мартадан Англия ва Испания чемпионлигини қўлга киритган, шунингдек, бир марта Франция чемпионатида зафар қучган. Чемпионлар Лигаси ва Европа Лигаси совринларини ҳам қўлга киритган.

Бельгия терма жамоаси сафида 126 та ўйин ўтказган ва ЖЧ—2018 бронза медали соҳибига айланган.