«Манчестер Сити» вингери Савио фаолиятини «Тоттенхэм»да давом эттиришга қарор қилди.

Журналист Бен Жейкобснинг хабар беришича, 22 ёшли футболчи ўз режалари ҳақида «шаҳарликлар» раҳбариятини аллақачон огоҳлантирган. Қайд этилишича, бразилиялик вингер ўтган ёздаёқ «шпорлар» сафига кўчиб ўтишга тайёр эди, бироқ ўшанда Манчестер клуби ушбу келишувга розилик бермаган. Ҳозиргача трансфер шартлари тўлиқ келишиб олинмаган бўлса-да, клублар ўртасидаги музокаралар давом этмоқда.

Transfermarkt портали экспертлари Савионинг трансфер қийматини 35 миллион еврога баҳоламоқда. Ортда қолган мавсумда футболчи Англия вице-чемпионлари сафида барча турнирларда 36 та ўйинда майдонга тушиб, ўз ҳисобига 4 та гол ва 3 та голли узатма ёздириб қўйган.