Antonio Ryudiger "Braga" murabbiyining yordamchisi bilan irqchilik tufayli janjallashib qolishi mumkin edi.

Eslatib o‘tamiz, kecha "Real Madrid" himoyachisi Chempionlar ligasi doirasida "Braga"ga qarshi o‘yinda (2:1) g‘alaba qozonganidan so‘ng, maydon markazida kurash boshlagan edi. “Real”ning bir qancha futbolchilari va bosh murabbiyi Karlo Anchelotti nemis futbolchisini tinchlantirishga urinib, yakunda uni maydondan olib ketishdi.

Cadena Ser nashri xabariga ko‘ra, Ryudigerning xatti-harakati "Braga" murabbiylar shtabi a’zolaridan birining irqiy haqoratiga munosabat bo‘lgan. Qayd etilishicha, "Real" sodir bo‘lgan voqea haqida hech qanday bayonot berishni rejalashtirmayapti.

Ryudigerning o‘zi, o‘z navbatida, unga qarshi irqchilik ko‘rinishlari haqidagi ma’lumotlarni rad etdi.

"Do‘stlar, hammasi yaxshi, men xotirjamman. U, albatta, meni irqiy haqorat qilmagan - final hushtagidan so‘ng to‘qnashganimizda kichik janjal bo‘ldi. Endi diqqatimizni shanba kuniga qarataylik!" - deb post qoldirdi Ryudiger.

Biroq, Cadena Ser jurnalisti Antonio Romero voqea guvohlariga tayanib, nemis himoyachisi "olovga yog‘ quyishni" istamagani uchun irqchilikka duch kelganini rad etishini aytdi.