«Surxon» klubining ko‘plab muxlislari jamoa stadionining navbatdagi futbol mavsumiga tayyorgarligi bilan qiziqishmoqda. Biz barcha savollarga javob beramiz.
«Surxon Arena»dagi rekonstruksiya ishlari qanday ketmoqda?
Uy stadionida rekonstruksiya ishlari jadal davom etmoqda, stadion maysasini, shuningdek, mashg‘ulot maydonini obodonlashtirish ishlari olib borilmoqda, zamonaviy "Phillips" projektorlari o‘rnatildi. Barchasi FIFA va OFK standartlariga javob beradi. Shuningdek, tomoshabinlar uchun zarur shart-sharoitlar yaratish, shuningdek, ichki binolarni (echinish xonalari, matbuot xizmati xonalari, sog‘lomlashtirish jarayonlari xonalari, sport zali, doping nazorati xonasi, hakamlar xonasi, va hokazo) ta’mirlash ishlari olib borilmoqda
O‘zPFL mutaxassislari tomonidan bo‘lib o‘tgan tekshiruv jarayoni qanday o‘tdi?
O‘tgan yilning 17 dekabr sanasida O‘zPFL mutaxassislari Termizda bo‘ldi. Stadionga POA PRATENCE maysasi yotqizilgan bo‘lib, uni parvarishlash ishlari olib borilmoqda. Endigina unib chiqayotgan maysa o‘zini ushlab olishi uchun biroz vaqt kerak. Hozircha maysa ildizining uzunligi 4 sm.ga yetgan. Drenaj tizimi to‘liq kuch bilan ishlamoqda.
7 yanvar kuni Liga mediasi "Surxon arena"da bo‘ldi va amalga oshirilayotgan ishlarni suratga oldi. Ayni vaqtda nafaqat asosiy maydon, balki uning orqasida joylashgan mashg‘ulot maydoni ham zamonaviy usulda tayyorlanmoqda. Muxlislar joy olishi mo‘ljallangan tribunalar osti tekislab qotirilgan. Endilikda uning ustiga o‘rindiqlar o‘rnatiladi. Texnik zona, kiyim almashtirish, hakamlar va komissarlar xonalarida to‘liq yangilash ishlari olib borilmoqda. Zaxira o‘rindiqlari muxlislar futbol tomosha qilishiga halal bermasligi uchun maysa sathidan pastroqqa tushirilgan va uning uchun kerakli jihozlar xarid qilingan. Endilikda TV kameralari o‘rnatiladigan nuqtalar, OAV uchun lojalar va boshqa xonalarni Liga talabi asosida shakllantirish ishlari olib boriladi. Quyidagi video orqali amalga oshirilgan ishlarni ko‘rish mumkin
Qachon «Surxon Arena»da jamoa o‘z o‘yinlarini o‘tkazadi?
«Surxon arena» avgust oyiga qadar futbol uchrashuvlarini qabul qila olishga tayyor holga keltirilishi rejalashtirilgan. Klub mavsumning ikkinchi davrasidan e’tiboran Termizga qaytish uchun barcha ishni amalga oshirmoqda. Unga qadar mavsumning birinchi davrasini Toshkentdagi "Paxtakor" stadionida o‘tkazib turadi.
