Osiyo Chempionlar ligasi, nimchorak finali javob uchrashuvi doirasidagi “Al-Ittihod” – “Navbahor” (2:1) jamoalari o‘rtasidagi o‘yindan keyingi matbuot anjumanining birinchi qismida namanganliklar bosh murabbiyi Samvel Babayan ishtirok etib, OAV xodimlarining savollariga javob berdi. Quyida uning fikrlarini e’tiboringizga havola etamiz.
- Barchaga xayrli kech! Bugun “Navbahor” uchun tarixiy lahza. Boisi, OCHL musobaqasida jamoa ilk bor ushbu bosqichga qadar yetib keldi. Albatta, turnirni o‘yin yakunida o‘z darvozamizdan alamli tarzda to‘p o‘tkazib yuborib, tark etish alamli. Bugun biz tarkibida jahon darajasidagi top yulduzlari bo‘lgan Osiyoning eng kuchli jamoalaridan biriga qarshi maydonga tushib,munosib qarshilik ko‘rsata oldik. Ayniqsa, uchrashuvnng 2-bo‘limida yigitlar reja bo‘yicha harakat qilib,qarshi hujumlarda imkoniyatdan foydalanishga harakat qilishdi.Yigitlar bugungi o‘yinda maydonda jonbozlik ko‘rsatib, muxlislarga quvonch ulashish uchun qo‘ldan kelganicha intilishdi. Ishqibozlar “Navbahor” bilan faxrlanishsa arziydi. Mavsum-2024da shogirdlarim har bir o‘yinda ijobiy natijaga erishish, muxltslarni xursand etish uchun qo‘ldan kelganicha harakat qilishadi. Mavsum endi boshlanyapti va OCHL nimchorak finali doirasidagi mazkur o‘yinlar jamoamizga tajriba vazifasini o‘taydi. Afsuski, OCHL musobaqasi biz uchun yakunlandi. Ammo “Navbahor” bu yilgi mavsumda o‘zining nimalarga qodirligini namoyish etadi.
Raqibni g‘alaba bilan tabriklayman va “Al-Ittihod”ga OCHLning keyingi bosqich o‘yinlarida omad tilayman.
Shogirdlarimning o‘yinidan qoniqish hosil qildim, ular mardonavor tarzda kurashishdi. Biz raqibning kuchidan kelib chiqqan holda, o‘yin uslubini ishlab chiqqandik. To‘g‘ri, uchrashuvning 1-bo‘limida mezbonlar hujumkor o‘yin namoyish etishdi, ammo 2-bo‘limda darvozamiz oldida birortayam xavfli vazitya yarata olishmadi.Butun uchrashuv davomida yigitlar yaxshi himoyalana olishdi.
Kuchli futbolchilarga ega “Al-Ittihod”ga qarshi taktika ishlab chiqqandik va shogirdlarim ko‘rsatmalarimni to‘liq bajarishdi, - dedi “lochinlar” ustozi.
