Qatar mezbonlik qiladigan Osiyo Kubogi musobaqasi 15 aprel kuni start olib, 3 may kunigacha davom etadi. Ushbu musobaqa Parijda bo‘lib o‘tadigan Olimpiada o‘yinlariga yo‘llanma beradi.

Olimpiya terma jamoasi bosh murabbiyi Timur Kapadze 23 o‘yinchidan iborat futbolchilari ro‘yxatini e’lon qilgan edi. Ushbu ro‘yxatdan jamoaning asosiy o‘yinchilari Abduqodir Husanov, Abbosbek Fayzullayev, Hojimat Erkinov kabi futbolchilar o‘rin olmagan.

O‘zbekiston futbol assosiasiyasi hozirda legioner futbolchilarimizni  musobaqaga jalb qilish borasida muzokaralar davom etayotgani va bu ro‘yxat yakuniy emasligini ma’lum qildi.

“Daryo” manbasining xabar berishicha, O‘zbekiston futbol assosiasiyasi musobaqada qatnashish uchun Abbosbek Fayzullayev hamda Ibrohimhalil Yo‘ldoshev faoliyat olib boradigan klublar bilan kelishuvga erishib bo‘lgan. Hojimat Erkinov hamda Fransiya chempionatida harakat qilayotgan Abduqodir Husanovning musobaqada qatnashishi hali ham so‘roq ostida qolmoqda.

Manba ikki futbolchini Qatardagi musobaqada ishtiroki uchun muzokalar hali ham davom etayotganini qo‘shimcha qildi.

Eslatib o‘tamiz, Timur Kapadze shogirdlari musobaqadagi ishtirokini 17 aprel kuni Malayziyaga qarshi o‘yin bilan boshlaydi. Uchrashuv Ar-Rayyandagi Khalifa International stadionida bo‘lib o‘tadi. O‘yinning boshlanish vaqti: 18:00.