“Bavariya” futbol klubi Germaniya janubidagi suv toshqini qurbonlari uchun 1 million yevro xayriya qildi, deya xabar bermoqda jamoa rasmiy sayti. Ma’lum qilinishicha, klub yaqin vaqt ichida bu mablag‘larning aniq qay tarzda ishlatilishi haqida qaror qabul qiladi.

“Toshqin katta zarar va dahshatli azob-uqubatlarga olib keldi. Ayniqsa, bunday favqulodda vaziyatlarda o‘ziga xos jamoatchilik ruhi kerak. “Bavariya” birdamlik ko‘rsatishga va jabrlanganlarni qo‘llab-quvvatlashga intiladi”, — deya klub prezidenti Gerbert Xaynerning so‘zlarini keltiradi Myunxen matbuot xizmati.

Hodisa oqibatida 4 kishi halok bo‘lgan, minglab odamlar o‘z uylarini tashlab chiqib ketishga majbur bo‘lgan.

Ma’lumot uchun, Germaniyada bunday halokat 2021 yilda sodir bo‘lgan va o‘sha payti 130 dan ortiq kishi hayotiga zomin bo‘lgan edi.