Argentina polisiyasi Anxel Di Mariya oilasiga tahdid qilganlikda gumonlanganlarni hibsga oldi.
Eslatib o‘tamiz, Argentina terma jamoasining sobiq vingeri o‘z shahrida sodir bo‘layotgan giyohvand moddalar savdosi va boshqa voqealar haqida gapirib o‘tgandi: "U yerda ota-onam va opa-singillarim yashaydi, shuning uchun sodir bo‘layotgan voqealar menga juda ta’sir qiladi. Bu juda hayratlanarli. Lekin har doim orzu va umid bor".
Shundan so‘ng Argentinadagi Di Mariyaning uyiga mashina yetib keldi. Unda o‘tirganlar shunday xabar qoldirdilar: “O‘g‘ling Anxelga ayt, Rosarioga qaytmasin. Agar u bunga quloq solmasa, oilangizdan birovni o‘ldiramiz. Biz mayda qog‘oz parchalarini emas, balki o‘liklarni sochamiz".
Mashina uydan katta tezlikda ketayotganida to‘rtta o‘q ovozi eshitildi.
Rosario polisiyasi gumonlanuvchilarni hibsga oldi. Ular Anxel Di Mariyaga tahdid qilganlikda ayblangan.
Bundan tashqari, polisiya Santa-Fe shahrining g‘arbiy qismida operasiya o‘tkazib, guruh a’zosi hisoblangan Marselo “Kolo” Rubattinoni qo‘lga oldi.
Tintuvlar davomida taxminan 20 million peso topildi va bir nechta mobil telefonlar musodara qilindi.
