Аргентина полицияси Анхель Ди Мария оиласига таҳдид қилганликда гумонланганларни ҳибсга олди.

Эслатиб ўтамиз, Аргентина терма жамоасининг собиқ вингери ўз шаҳрида содир бўлаётган гиёҳванд моддалар савдоси ва бошқа воқеалар ҳақида гапириб ўтганди: "У ерда ота-онам ва опа-сингилларим яшайди, шунинг учун содир бўлаётган воқеалар менга жуда таъсир қилади. Бу жуда ҳайратланарли. Лекин ҳар доим орзу ва умид бор".

Шундан сўнг Аргентинадаги Ди Мариянинг уйига машина етиб келди. Унда ўтирганлар шундай хабар қолдирдилар: “Ўғлинг Анхелга айт, Росариога қайтмасин. Агар у бунга қулоқ солмаса, оилангиздан бировни ўлдирамиз. Биз майда қоғоз парчаларини эмас, балки ўликларни сочамиз".

Машина уйдан катта тезликда кетаётганида тўртта ўқ овози эшитилди.

Росарио полицияси гумонланувчиларни ҳибсга олди. Улар Анхель Ди Марияга таҳдид қилганликда айбланган.

Бундан ташқари, полиция Санта-Фе шаҳрининг ғарбий қисмида операция ўтказиб, гуруҳ аъзоси ҳисобланган Марсело “Коло” Рубаттинони қўлга олди.

Тинтувлар давомида тахминан 20 миллион песо топилди ва бир нечта мобил телефонлар мусодара қилинди.