Superliganing 15-turidan o‘rin olgan OKMK - "Navbahor" (2:1) uchrashuvidan keyingi matbuot anjumanining birinchi qismida namanganliklar bosh murabbiyi Sergey Lushan ishtirok etib, OAV xodimlarining savollariga javob berdi. "Lochinlar" ustozi odatdagidek, o‘z so‘zini o‘yin haqidagi fikrlari bilan boshladi.
- Avvalo raqib jamoani g‘alaba bilan tabriklayman. Ikki jamoa uchun ham qiyin bahs bo‘ldi. Oson bo‘lmasligi aniq edi. Bugungi uchrashuvda ayrim bir muammolarga duch keldik. Tarkibdagi yetishmovchilik va boshqa jihatlar bizga xalal bermoqda. Yigitlar hali hamon og‘ir bosim ostida. Yosh futbolchilarimiz iqtidorli, ammo ularning ritmga tushib olishlari uchun biroz vaqt kerak. OKMK jamoasi bugun haqli ravishda g‘alaba qozondi. Raqibni g‘alaba bilan tabriklayman.
-"Navbahor"ning ikki uchrashuvini ko‘rishga muvaffaq bo‘ldim. Jamoa o‘yinida o‘sish sezilmoqda. Jamoam o‘yin bilan bog‘liq muammolarga duch keldi, dedingiz. Ushbu muammolar va kamchiliklar haqida batafsilroq to‘xtalsangiz...
- Asosiy muammomiz - realizasiya. Raqibimiz o‘yin davomida ikkita zarba berdi va ikkita gol urdi. Biz esa 8-9 marotaba to‘pni so‘nggi zarba bilan yakunlovchi vaziyatlarga qadar olib keldik, lekin... Vaziyatlardan gol urgan jamoa g‘alaba qozonadi. Bu juda oddiy formula. Shunchaki gol urishimiz kerak. Hujumda xavfliroq tajovuzkor o‘ynashni boshlaganimizni bilaman. Balki bizga biroz vaqt kerakdir. Durang bugungi bahs uchun adolatli natija bo‘lishi mumkin edi, lekin futbolda so‘nggi daqiqalargacha o‘ynay oladigan
va kurashgan jamoa g‘alaba qozonadi. Raqibimiz ikkinchi goldagi hujumni ajoyib amalga oshirdi. Tezkorlik bilan hujumga o‘tishdi, shunchaki qoyil. OKMK o‘zgarishlarni ham to‘g‘ri qildi. Bizning zaxiramiz esa oqsamoqda. Bu bizning muammolarimiz hamda bunga o‘zimiz aybdormiz. Ushbu muammolarga o‘zimiz yechim topishga majburmiz.
- Realizasiya haqida gapirib o‘tdingiz. Chempionatimizning eng yaxshi to‘purarlaridan biri Toma Tabatadze "Navbahor" mashg‘ulotlarida qatnashmayapti. Uning jarohati haqida ma’lumot berib o‘tsangiz?
- Tabatadzeni hali maydonda ko‘rganim yo‘q. Kecha u O‘zbekistonga qaytib keldi. Toma bilan gaplashib oldik. Jarohatidan forig‘ bo‘lganiga qaramay, u hali hamon o‘zini noqulay his qilmoqda. Tabatadzeni yaqin orada maydonda ko‘rmaymiz.
Sardor Rashidov ham uzoq vaqtga safdan chiqdi. Sayfiyevda diskvalifikasiya bor edi.U
keyingi uchrashuvda maydonga qaytadi.
Ikkinchi hujumchimiz Giorgi Nikabadze ham jarohat bilan ukollar orqali o‘ynamoqda. Uning o‘rnini egallay oladigan futbolchi yo‘q, afsuski.
- Zaxira yetishmovchiligi bilan bog‘liq bo‘lgan muammoni qanday hal etmoqchisiz? Ushbu vaziyatdan chiqib ketish bo‘yicha qandaydir rejangiz bormi?
- Yagona yechim shu tarkibimiz. Ixtiyorimizdagi futbolchilar bilan o‘ynashda davom etamiz. Mavsum yarmi va mavsum avvalida seleksiya ishlarini olib borish ikki xil masala. Yozda ko‘p futbolchilar band hamda amaldagi shartnomasi bo‘ladi. O‘zingiz istagan futbolchini harid qilish qiyin masala.
- Yozda o‘zimiz istagancha transferlar amalga oshira olmadik, dedingiz. Transferlar bo‘yicha qanday rejangiz bor edi?
- Bizdagi transfer taqiqi bo‘yicha xorijlik futbolchilar bilan shartnoma tuza olmaymiz. Hozirgi holatimiz shunday va shunga moslashishimiz kerak.
