Parijdan yana bir xushxabar. Para yengil atletikachimiz Tolibboy Yo‘ldoshev O‘zbekiston delegasiyasi hisobiga to‘qqizinchi oltin medalni taqdim qildi.

F37 klassida disk uloqtirish sektorida ishtirok etgan yurtdoshimiz 57.28 metr natija bilan faoliyatidagi eng yaxshi ko‘rsatkichni qayd etib, oltin medalga sazovor bo‘ldi. Tolibboy ta’qibchilarini katta farq bilan ortda qoldirdi. Ikkinchi o‘rindagi kanadalik sportchining eng yaxshi urinishi 53,24 metr bo‘ldi.

Ushbu muvaffaqiyatdan keyin O‘zbekiston delegasiyasi hisobidagi medallar hozirgacha 9 ta oltin, 6 ta kumush va 4 ta bronzaga yetdi.