Buyuk Lionel Messi 19 yillik professional faoliyatida jami 130ta klubga qarshi o‘ynagan.
Fakt: «Oltin to‘p»ning 8 karra sohibi shundan 125tasi bilan o‘yinlarda gol urgan yoki loaqal assistent rolini bajargan. Oddiy aytganda, atigi 5ta klub Messining goli yoki samarali uzatmasidan «benasib» qolgan. Qiziq, qaysi klublar argentinalikni to‘xtatib qolish uddasidan chiqqan?
«Gramenet» (Ispaniya)
Argentinalik yulduz ko‘pchilik uchun notanish ushbu klub bilan atigi bir marta to‘qnash kelgan. Gap mavsum—2004/2005da Ispaniya kubogi 1/32 finalidan o‘rin olgan o‘yin haqida ketmoqda. O‘shanda Leo maydondan samarali harakatsiz chiqqan va «Barselona» kamtarin raqibiga 0:1 hisobida yutqazgandi.
«Udineze» (Italiya)
Messi Udinening mag‘rur jamoasi bilan CHL-2005/2006-da tanishgandi o‘yin vositasida. Aniqroq bayon etsak, 18 yoshli Lionel «Udineze»ga qarshi bahsda 70 daqiqa harakatlangan va na gol urgan va na assist qayd etgan. To‘g‘ri, yakuniy natijada yosh Leoning samarasiz to‘p surgani bilinmagan - «Barselona» Italiya klubini 4:1 hisobida tor-mor keltirgandi.
«Bordo» (Fransiya)
Leo Messi «PSJ»ning Liga 1-2021/2022 28-turidan o‘rin olgan «Bordo»ga qarshi o‘yinida to‘liq vaqt davomida yelib-yugurdi, ammo samarasiz. Garchi raqib argentinalik yulduzni butunlay zararsizlantirish uddasidan chiqqan bo‘lsada, parijliklar 3:0 hisobida g‘alaba qozonishgan edi.
«Toronto» (Kanada)
«Inter Mayami»ning amaldagi bosh yulduzi Kanada klubi bilan o‘tgan yilning sentyabr oyida yuzlashdi. MLS doirasidagi ushbu uchrashuv argentinalik dahocha uchun omadsiz keldi va u 37-daqiqada jarohat ortidan o‘z o‘rnini zaxira vakiliga bo‘shatib berdi. Garchi Leo samarali harakatsiz qolgan bo‘lsada, «Inter Mayami» yakunda yirik hisobli g‘alaba (4:0)ni rasmiylashtirdi.
«Rubin» (Rossiya)
Lionel Messi uchun eng murakkab raqib. Diqqat qiling, u Qozon jamoasiga qarshi kechgan 4ta o‘yinda ishtirok etgan, ammo... Barcha uchrashuvlar CHL guruh bosqichida bo‘lgan (mavsum-2009/2010da 1:2 va 0:0, mavsum-2010/2011da 1:1 va 2:0). Muayyan raqibga qarshi 4ta o‘yin va «Gol+pas» tizimi bo‘yicha «0+0» - bunaqasi Messi faoliyatini boshqa kuzatilmagan.
Jahongir MIRZO tayyorladi
