Яхшилар, бугун сэр Алекс ҳақида кўп ва хўп ёзяпмиз. Бу учун бизни кечирасиз. Кеч бўлганига қарамай, уйқум келмади. Сэр ҳақида маълумотларни қидирдим.
Афсус футбол тарихидаги энг яхши мурббий билан учрашмаганман, лекин у киши билан нафақат биз, балки Ўзбекистон деган жаннатмакон юртнинг барча футбол мухлислари ғойибона танишлар. Ҳамма у кишини яхши кўради. Шунинг учун тун ярмидан оғганда яна сэр ҳақида ёзиб, энсагизни қотирган бўлсак, айбга буюрмайсиз.
Кеча Англия кубогининг финал баҳси бўлиб ўтди. Роса драмматик воқеаларга бой бўлди ўйин. Бу ерда барча нарсадан қуруқ қолган Манчини, бу ерда чемпионшипга тушиб кетаётган бўлса ҳам жамоасининг ўйинини шакллантириб улгурган Мартинес. Энг қизиғи иккиси ҳам Роверто. Фақат бири италиялик, бири испан.
Демак кубокни кутилмаганда «Уиган» илиб кетди. Бошқа вақтда шу воқеа бўлганда бу жуда муҳим кун ёки ҳафта мавзуси бўлиши мумкин эди, лекин ҳозир футбол оламида шундай воқеа содир бўляптики ҳаттоки «Барселона»нинг чемпион бўлгани ҳам, ўз ўзидан Англия кубоги ҳам сояда қолиб кетмоқда. Албатта сэр Алекснинг футболдан кетиши ҳақида гап кетмоқда.
Таниқли футбол рассоми Омар Момани ушбу ҳолатга ўзининг қуйидаги карикатураси билан муносабат билдирди.
