Kataloniyaning “Barselona” klubi qanot hujumchisi pozisiyasini kuchaytirish uchun besh nafar futbolchi nomzodini ko‘rib chiqadi. Bu haqda Ispaniyaning Sport.es nashri xabar berdi.

Manbaga ko‘ra, jamoa uchun ustuvor variant — “Atletik” klubining ispaniyalik hujumchisi Niko Uilyams bo‘lib turibdi. Futbolchining tovon puli 60 million yevroni tashkil qiladi. “Barselona” o‘tgan mavsumdayoq ushbu futbolchini tarkibga qo‘shib olishni rejalashtirgan edi. Endilikda klub 2025 yil yozida kelishuvni o‘z foydalariga hal qilishga ishonmoqda.

Shuningdek klub Xvicha Kvarasxeliya (“Napoli”), Rafael Leau (“Milan”) va Markus Reshford (“Manchester Yunayted”) kabi futbolchilarning transferini ham ko‘rib chiqmoqda. Biroq bu futbolchilarni qo‘lga kiritish katta mablag‘ talab qilishi sababli, murakkab variant sifatida baholanmoqda.

Moliyaviy nuqtai nazardan “Barselona” uchun eng qulay transfer varianti sifatida “Chelsi” klubining fransiyalik universal hujumchisi Kristofer Nkunku ko‘rilmoqda. U jamoa bosh murabbiyi Enso Mareska qo‘l ostida ikkinchi hujumchi sifatidagi rolidan norozi bo‘lmoqda.