Каталониянинг “Барселона” клуби қанот ҳужумчиси позициясини кучайтириш учун беш нафар футболчи номзодини кўриб чиқади. Бу ҳақда Испаниянинг Sport.es нашри хабар берди.

Манбага кўра, жамоа учун устувор вариант — “Атлетик” клубининг испаниялик ҳужумчиси Нико Уильямс бўлиб турибди. Футболчининг товон пули 60 миллион еврони ташкил қилади. “Барселона” ўтган мавсумдаёқ ушбу футболчини таркибга қўшиб олишни режалаштирган эди. Эндиликда клуб 2025 йил ёзида келишувни ўз фойдаларига ҳал қилишга ишонмоқда.

Шунингдек клуб Хвича Кварацхелия (“Наполи”), Рафаэл Леау (“Милан”) ва Маркус Рэшфорд (“Манчестер Юнайтед”) каби футболчиларнинг трансферини ҳам кўриб чиқмоқда. Бироқ бу футболчиларни қўлга киритиш катта маблағ талаб қилиши сабабли, мураккаб вариант сифатида баҳоланмоқда.

Молиявий нуқтаи назардан “Барселона” учун энг қулай трансфер варианти сифатида “Челси” клубининг франциялик универсал ҳужумчиси Кристофер Нкунку кўрилмоқда. У жамоа бош мураббийи Энсо Мареска қўл остида иккинчи ҳужумчи сифатидаги ролидан норози бўлмоқда.