OKMK futbol klubi qishki transferlar mavsumida yosh va iste’dodli futbolchilarni jalb qilish bilan bir qatorda o‘tgan mavsumdagi muvaffaqiyatli tarkibni saqlab qolishga ham katta e’tibor qaratadi.

2024 yilgi mavsumda O‘zbekiston chempionatida OKMK FKning sovrindorlar safidan joy egallashi uchun katta hissa qo‘shgan yarim himoyachi Oybek Rustamov bilan shartnoma yana bir yilga uzaytirildi. Klub rahbariyatining olib borgan muzokaralari natijasida huquqiy jihatdan "Qo‘qon-1912" jamoasiga tegishli bo‘lgan 27 yoshli futbolchi kelasi mavsumda ham "konchilar" sharafini himoya qiladi.

Shartnomaga ko‘ra, Oybek Rustamov 2025 yilning oxirigacha OKMK FK tarkibida harakat qiladi. U o‘tgan mavsumda Superligada "konchilar" safida 23 ta o‘yinda ishtirok etib, 2 ta gol urdi va 2 ta samarali golli uzatmani amalga oshirdi. Shuningdek, kubok bahslarining 3 ta o‘yinida maydonga tushgan Oybek Rustamov raqib darvozasiga bir bor yo‘l topa oldi.

Klub rahbariyati Oybek Rustamovning tajribasi va mahorati kelasi mavsumda ham yangi marralarni zabt etishda, hal qiluvchi pallalarda ishonchli o‘yin ko‘rsatib, jamoaning g‘alabalari va yutuqlarini mustahkamlashda muhim rol o‘ynashiga ishonch bildiradi.