“Paxtakor” hamda O‘zbekiston U-20 terma jamoasi yarim himoyachisi Muhammadali O‘rinboyev faoliyatini Belgiyaning “Antverpen” klubida davom ettirishga yaqin turgani haqida ma’lumot berib o‘tgan edik.

«Futbolchi bilan 3-4 yillik shartnoma imzolanadi. Hozirda O‘rinboyev viza masalasi hal bo‘lishini kutmoqda.

O‘rinboyev bir muddat Angliyaning “Brentford” klubi yoshlar jamoasida yarim yillik amaliyot o‘tab kelgan, ammo bu safar so‘z professional shartnoma haqida bormoqda. 20 yoshli Muhammad uchun bu mavsum omadli ketmoqda — u “Paxtakor” safida chempionat va Kubok doirasida 14 ta o‘yinda 5 gol va 3 assist qayd etgan. Shuningdek, U-20 Osiyo Kubogida jamoa sardori bo‘lib 4 o‘yinda 4 gol va 1 assist bilan ajralgan.

“Antverpen”ga hujumkor yarim himoyachi kerak. Hozir bu pozisiyada 37 yoshli tajribali futbolchi, to‘purar Tyaronn Cherri harakat qilmoqda, lekin u bu mavsum oxirida jamoani tark etadi. Nemis futbolchisi Kristofer Skott ham bor, ammo u ko‘p jarohat oladi va asosiy tarkibda deyarli o‘ynamaydi. Shuningdek, yaqinda o‘rinbosarlar jamoasidan asosiy tarkibga o‘tkazilgan bir necha yoshlar ham bor, lekin ularda yetarlicha tajriba yo‘q. Shunday ekan, barcha imkoniyatlar O‘rinboyevning o‘ziga bog‘liq. Menimcha, Belgiya chempionati uning top-5 ligalar klublariga yo‘l ochuvchi tramplinga aylanishi mumkin», — deb yozadi Rossiyalik jurnalist Aleksandr Troiskiy o‘zining telegram-kanalida.

Eslatib o‘tamiz, “Antverpen” Belgiya chempioni unvonini 5 marta qo‘lga kiritgan (1928/29, 1930/31, 1943/44, 1956/57, 2022/23 yilgi mavsumlar).