"Manchester Yunayted"ning yozgi transfer bozoridagi vazifalaridan biri yangi darvozabonni qo‘lga kiritishdir. Andre Onana o‘tgan mavsumda ko‘p xatolarga yo‘l qo‘ydi va kamerunlik posbon jarohat oldi.
The Telegraph nashri xabariga ko‘ra, "qizil iblislar" allaqachon "PSJ"ga Janluiji Donnarumma bo‘yicha so‘rov yuborishgan. Liga 1 grandi "mankunianliklar" uchun tez orada italiyalik darvozabon bilan aloqalarni tiklashga tayyor. "PSJ" 26 yoshli Donnarummani bir yil ichida tekinga boy bermaslik uchun shu yozda sotishga majbur bo‘lishi mumkin. Gap shundaki, futbolchi va klub o‘rtasida yangi shartnoma bo‘yicha muzokaralar qiyin kechmoqda.
