Italiyaning "Atalanta" klubi yangi bosh murabbiyi Ivan Yurich futbolchi Ademola Lukmanning mashg‘ulotlarda ishtirok etishdan bosh tortganiga izoh berdi. Lukman klub uni 45 million yevro evaziga "Inter"ga sotishni istamaganidan hafsalasi pir bo‘ldi.

"Ademola men bilan juda samimiy gaplashdi, u o‘z fikrlarini tushuntirdi. Biz shunchaki vaziyatni qabul qilishimiz kerak. Achinarlisi, shu darajaga yetib keldik. U boldir mushaklaridan jarohat olganida, men jamoaga murabbiy bo‘lib tayinlangandim, keyin bu sodir bo‘ldi. Men u bilan ishlay olmadim. Har holda bu jamoa tarkibiga ta’sir qilmadi," - dedi Yurich.

Nigeriya terma jamoasining 27 yoshli vingeri 2022 yildan beri "Atalanta" sharafini himoya qilmoqda. U o‘tgan davr mobaynida 118 ta o‘yinda maydonga tushib, 52 ta gol urdi va 25 ta golli uzatmani amalga oshirdi.