Италиянинг "Аталанта" клуби янги бош мураббийи Иван Юрич футболчи Адемола Лукманнинг машғулотларда иштирок этишдан бош тортганига изоҳ берди. Лукман клуб уни 45 миллион евро эвазига "Интер"га сотишни истамаганидан ҳафсаласи пир бўлди.

"Адемола мен билан жуда самимий гаплашди, у ўз фикрларини тушунтирди. Биз шунчаки вазиятни қабул қилишимиз керак. Ачинарлиси, шу даражага етиб келдик. У болдир мушакларидан жароҳат олганида, мен жамоага мураббий бўлиб тайинлангандим, кейин бу содир бўлди. Мен у билан ишлай олмадим. Ҳар ҳолда бу жамоа таркибига таъсир қилмади," - деди Юрич.

Нигерия терма жамоасининг 27 ёшли вингери 2022 йилдан бери "Аталанта" шарафини ҳимоя қилмоқда. У ўтган давр мобайнида 118 та ўйинда майдонга тушиб, 52 та гол урди ва 25 та голли узатмани амалга оширди.