«Marsel» klubi «Real» yarimhimoyachisi Dani Sebalyosga qiziqish bildirdi. Insayder Fabrisio Romano ma’lumotiga ko‘ra, fransiyaliklar «qaymoqranglilar» bilan muzokara boshlab yuborgan.

Shartnomani amalga oshirish oson emas. «Marsel» Sebalyosni sotib olish huquqi bilan ijaraga olishga tayyor. Ispaniyalik futbolchi «Velodrom»da jamoaning markaziy chizig‘ida yetakchi o‘yinchiga aylanishi kutilmoqda.

Joriy mavsumda Sebalyos maydonda bor-yo‘g‘i 4 daqiqa to‘p surdi. O‘tgan mavsumda esa u barcha musobaqalarda 45 ta o‘yin o‘tkazib, 2 ta golli uzatma qayd etgan. Sevilyaning «Betis» klubi tarbiyalanuvchisining «Real» bilan tuzgan shartnomasi 2027 yil yoziga qadar amal qiladi.