Portugaliyaning «Braga» klubi Saudiya Arabistonining «Al-Ittihod» jamoasi bilan 19 yoshli vinger Rojer Fernandesh transferi bo‘yicha kelishuvga erishilganini ma’lum qildi. Portugaliya klubi matbuot xizmati xabariga ko‘ra, transfer summasi 32 mln yevroni tashkil qiladi.
Shuningdek, shartnomada shaxsiy va jamoaviy bonuslar ishga tushirilgan taqdirda, «Braga» qo‘shimcha 2,5 mln yevro olishi mumkin. Bunday holda bitimning umumiy qiymati 34,5 mln yevroga yetadi.
«Braga» Rojerga shaxsiy va professional faoliyatida omad tilaydi», — deyiladi klub rasmiy saytidagi bayonotda.
Rojer Fernandesh — «Braga» tarbiyalanuvchisi. U asosiy jamoada 2023 yil yozidan beri harakat qilib kelmoqda. Jami klub safida 91 ta uchrashuvda maydonga tushib, 12 ta gol va 16 ta golli uzatma muallifi bo‘lgan.













