"Manchester Yunayted" forvardi Joshua Zirkzee qishki transfer oynasida ko‘proq o‘yin daqiqalariga ega bo‘lmasa, klubni tark etadi. Bu haqda Football Insider nashri xabar bermoqda.

Manbaga ko‘ra, Zirkzee "Manchester Yunayted"da kam o‘yin amaliyotiga ega bo‘lgani uchun bo‘lajak jahon chempionatini o‘tkazib yubormoqchi emas. Shu sababli 24 yoshli niderlandiyalik futbolchi, agar o‘sha vaqtga kelib vaziyat o‘zgarmasa, yanvar oyidayoq klubini o‘zgartirmoqchi.

Joriy mavsumda Zirkzee barcha turnirlarda 4 ta uchrashuvda maydonga tushdi, ammo umumiy hisobda bor-yo‘g‘i 82 daqiqa maydonda harakat qildi.

Hujumchining "qizil iblislar" bilan shartnomasi 2029 yilgacha mo‘ljallangan. Transfermarkt portali futbolchining narxini 30 million yevroga baholamoqda.