Indoneziya Isroil gimnastika jamoasi a’zolariga viza bermadi. Oqibatda yahudiy sportchilar oktyabr oyi oxirida Jakartada bo‘lib o‘tadigan Jahon badiiy gimnastika chempionatida qatnasha olmaydigan bo‘ldi. Bu haqda Indoneziya gimnastika federasiyasiga tayanib, Al Arabiya xabar berdi.

Musulmon aholisi eng ko‘p bo‘lgan davlat — Indoneziyada chempionat 19–25 oktyabr kunlari o‘tkazilishi rejalashtirilgan edi.

“Isroilliklar qatnashmaydi, bu rasman tasdiqlandi”, degan Indoneziya gimnastika federasiyasi rahbari Ita Juliati jurnalistlarga.

Indoneziyaning yuridik masalalar bo‘yicha vaziri Yusril Ihza Mahendraning aytishicha, viza berilmasligiga sabab – musulmon ulamolar kengashi va Jakarta hukumati tomonidan bildirgan e’tirozlar. Ta’kidlanishicha, Isroil Falastinning mustaqilligini to‘liq tan olmaguncha, ikki davlat o‘rtasida aloqalar o‘rnatilmaydi.

So‘nggi yillarda Indoneziya hukumati Isroilga nisbatan yumshoqroq yondashuvni namoyish etayotgani ham sir emas. Xususan, prezident Prabovo Subianto BMT Bosh Assambleyasida chiqish qilib, dunyo Falastin mustaqilligini tan olib, Isroil xavfsizligini ham kafolatlashi kerakligini ta’kidlagan edi.

Ayni paytda, bu ikki davlat o‘rtasida sport sohasida yuzaga kelgan ilk ziddiyat emas. FIFA 2023 yil mart oyida Indoneziyani 20 yoshgacha bo‘lgan futbolchilar o‘rtasidagi jahon chempionatini o‘tkazish huquqidan mahrum qilgan edi. Sababi — mahalliy gubernatorlardan biri Isroil jamoasini qabul qilishni rad etgan. Bundan tashqari, BMT mutaxassislari ham FIFA va Yevropa futbol assosiasiyalarini Isroilni xalqaro musobaqalardan chetlatishga chaqirmoqda.