Kataloniyaning "Barselona" klubi "Manchester Yunayted"dan mavsum oxirigacha ijaraga olingan angliyalik hujumchi Markus Reshfordning o‘yin darajasidan mamnun.
The Sun portali xabariga ko‘ra, "ko‘k-anorranglilar" rahbariyati hujumchining to‘laqonli transferini rasmiylashtirishni rejalashtirmoqda. Reshfordni sotib olish Kataloniya grandiga 25 million yevroga tushishi mumkin, yana 5 million "qizil iblislar"ga bonus to‘lovlari sifatida o‘tishi mumkin.
Markus o‘tgan transfer oynasida "Barselona"ga ijaraga berilgandi. Joriy mavsumda ingliz kataloniyaliklar safida o‘nta bahsda maydonga tushib, o‘z hisobiga uchta gol va beshta assist yozdirib qo‘ydi.
