O‘zbekiston futbol assotsiatsiyasi, OʻFA faxriylar kengashi raisi, OʻFA Ijroiya qoʻmitasi a‘zosi, Murabbiylar kengashi a’zosi, "O‘zbekiston Respublikasida xizmat ko‘rsatgan yoshlar murabbiysi" To’lagan Isoqovning vafoti munosabati bilan marhumning oila a’zolari va yaqinlariga chuqur hamdardlik bildiradi.

Oʻzbek futbolining jonkuyar fidoyisi, To‘lagan Isoqov o‘z umrini futbolga bag‘ishlagan. U futbolchi sifatida “Paxtakor” jamoasi sharafini 13 mavsum davomida munosib himoya qilgan, 252 o‘yinda maydonga tushib, 52 gol kiritishga muvaffaq bo‘lgan.

Murabbiylik faoliyatida davomida “Paxtakor”, “Zarafshon” va “Surxon” jamoalarini boshqargan, shuningdek, so‘nggi yillarda O‘FA faxriylar kengashiga rahbarlik qilib, mamlakatimizda futbolning ommalashishi, rivojlanishiga, bir soʻz bilan aytganda, futbolning har bir jabhasida oʻzining munosib hissasini qoʻshgan yetuk mutaxassis edi. Yosh avlodni Vatanga muhabbat, sportga sadoqat bilan yetishib chiqishi yo‘lida fidokorona xizmat qilgan.