"Kristal Pelas" markaziy himoyachisi Mark Gexi faoliyatini "Manchester Siti"da davom ettirishi mumkin. Bu haqda Football Insider nashri xabar bermoqda.
Manbaga ko‘ra, ayni damda "Manchester Siti" kelasi yozda "burgutlar" bilan shartnomasi yakunlanadigan Gexi uchun asosiy da’vogar bo‘lib turibdi. Ta’kidlanishicha, "shaharliklar" Gexini Jon Stounzning o‘rinbosari sifatida ko‘rmoqda.
"Liverpul" ham qolgan da’vogarlar kabi Gexi uchun kurashni davom ettirmoqda, ammo "Manchester Siti" bor kuchi bilan kelishuvni amalga oshirishga harakat qilmoqda. "Kristal Pelas" himoyachisini tekinga yo‘qotmoqchi emas, "shaharliklar" esa yanvar oyidayoq uning uchun 40 million yevro to‘lashga tayyor.
Joriy mavsumda 25 yoshli Gexi barcha musobaqalarda 22ta o‘yinda maydonga tushib, bitta gol urdi va to‘rtta golli uzatmani o‘z hisobiga yozdirib qo‘ydi.













