Hujumchi Muhammad Saloh "Liverpul"ning Chempionlar Ligasi umumiy bosqichining 6-turi doirasidagi "Inter" bilan o‘yin uchun qaydnomasiga kiritilmadi. Bu haqda mersisaydliklarning rasmiy saytida ma’lum qilingan.
"Qizillar" tarkibida Milanga 19 nafar futbolchi yo‘l oladi, ammo ular orasida misrlik futbolchi yo‘q. Taxminlarga ko‘ra, bu Salohning jamoadagi roli haqidagi so‘zlari, shuningdek, Angliya Premyer-ligasining 15-turi doirasidagi "Lids Yunayted"ga qarshi o‘yindan (3:3) so‘ng bosh murabbiy Arne Slotga nisbatan bildirgan tanqidlari bilan bog‘liq bo‘lishi mumkin.
Joriy mavsumda futbolchi "Liverpul" safida 19 ta o‘yin o‘tkazib, beshta gol urdi va uchta samarali uzatmani amalga oshirdi. Hujumchining klub bilan amaldagi mehnat shartnomasi 2027 yilning yozigacha mo‘ljallangan.













