Ҳужумчи Муҳаммад Салоҳ "Ливерпуль"нинг Чемпионлар Лигаси умумий босқичининг 6-тури доирасидаги "Интер" билан ўйин учун қайдномасига киритилмади. Бу ҳақда мерсисайдликларнинг расмий сайтида маълум қилинган.
"Қизиллар" таркибида Миланга 19 нафар футболчи йўл олади, аммо улар орасида мисрлик футболчи йўқ. Тахминларга кўра, бу Салоҳнинг жамоадаги роли ҳақидаги сўзлари, шунингдек, Англия Премьер-лигасининг 15-тури доирасидаги "Лидс Юнайтед"га қарши ўйиндан (3:3) сўнг бош мураббий Арне Слотга нисбатан билдирган танқидлари билан боғлиқ бўлиши мумкин.
Жорий мавсумда футболчи "Ливерпуль" сафида 19 та ўйин ўтказиб, бешта гол урди ва учта самарали узатмани амалга оширди. Ҳужумчининг клуб билан амалдаги меҳнат шартномаси 2027 йилнинг ёзигача мўлжалланган.













