Xalqaro futbol asosiasiyalari federasiyasi (FIFA) 2026-yilgi Jahon chempionati uchun cheklangan miqdordagi arzon chiptalarni sotuvga chiqarishini e’lon qildi. Bu qaror Yevropa futbol muxlislar uyushmasining narx siyosatiga bildirilgan tanqidlaridan so‘ng qabul qilindi. Bu haqda Reuters nashri xabar berdi.

Eng arzon chiptalar Supporter Entry Tier deb nomlandi. Ular turnirdagi barcha 104 o‘yinga, shu jumladan finalga ham amal qiladi, ammo ushbu tipdagi chiptalar soni cheklangan. FIFA ma’lumotiga ko‘ra, bunday chiptalar milliy futbol assosiasiyalari uchun ajratilgan kvotaning atigi 10 foizini tashkil qiladi va uning narxi 60 dollarga teng.

Milliy assosiasiyalar o‘z muxlislariga ushbu chiptalarni o‘z dasturlari doirasida taqsimlaydi. Qo‘shimcha qilinishicha, arzon chiptalar “o‘z terma jamoasining o‘yinlariga tez-tez tashrif buyuradigan sodiq muxlislarga” yetkazilishi kerak. Shu bilan birga, federasiya chiptalarni taqsimlash bo‘yicha yagona qoidalarni belgilamagan.

Shuningdek, FIFA milliy assosiasiyalar uchun ajratilgan chiptalarning yarmidan ko‘prog‘i nisbatan arzonroq joylardan berilgan. Ya’ni ulardan 40 foizi o‘rtacha narxdagi, 10 foizi eng arzon narxdagi chiptalar bo‘ladi. Qolgan qismi esa yuqori narxdagi chiptalar hisoblanadi. Milliy assosiasiyalar orqali chipta olgan muxlislarning jamoasi pley-off bosqichiga chiqmasa, ular pullarini komissiyasiz qaytarib olishadi.

Ma’lumot uchun, avvalroq JCH-2026 finaliga eng arzon toifadagi chiptalar narxi 4 185 dollardan boshlanishini ma’lum qilingandi. Bu ko‘rsatkich 2022-yilgi Jahon chempionati bilan solishtirganda deyarli yetti barobar baland (Qatardagi turnirning eng arzon chiptasi 600 dollar edi).