Халқаро футбол асоциациялари федерацияси (FIFA) 2026-йилги Жаҳон чемпионати учун чекланган миқдордаги арзон чипталарни сотувга чиқаришини эълон қилди. Бу қарор Европа футбол мухлислар уюшмасининг нарх сиёсатига билдирилган танқидларидан сўнг қабул қилинди. Бу ҳақда Reuters нашри хабар берди.

Энг арзон чипталар Supporter Entry Tier деб номланди. Улар турнирдаги барча 104 ўйинга, шу жумладан финалга ҳам амал қилади, аммо ушбу типдаги чипталар сони чекланган. FIFA маълумотига кўра, бундай чипталар миллий футбол ассоциациялари учун ажратилган квотанинг атиги 10 фоизини ташкил қилади ва унинг нархи 60 долларга тенг.

Миллий ассоциациялар ўз мухлисларига ушбу чипталарни ўз дастурлари доирасида тақсимлайди. Қўшимча қилинишича, арзон чипталар “ўз терма жамоасининг ўйинларига тез-тез ташриф буюрадиган содиқ мухлисларга” етказилиши керак. Шу билан бирга, федерация чипталарни тақсимлаш бўйича ягона қоидаларни белгиламаган.

Шунингдек, FIFA миллий ассоциациялар учун ажратилган чипталарнинг ярмидан кўпроғи нисбатан арзонроқ жойлардан берилган. Яъни улардан 40 фоизи ўртача нархдаги, 10 фоизи энг арзон нархдаги чипталар бўлади. Қолган қисми эса юқори нархдаги чипталар ҳисобланади. Миллий ассоциациялар орқали чипта олган мухлисларнинг жамоаси плей-офф босқичига чиқмаса, улар пулларини комиссиясиз қайтариб олишади.

Маълумот учун, аввалроқ ЖЧ-2026 финалига энг арзон тоифадаги чипталар нархи 4 185 доллардан бошланишини маълум қилинганди. Бу кўрсаткич 2022-йилги Жаҳон чемпионати билан солиштирганда деярли етти баробар баланд (Қатардаги турнирнинг энг арзон чиптаси 600 доллар эди).