Россиялик 17 ёшли дарвозабон Тимофей Толстенев «Ғазалкент» клубидаги дебютини ўтказди. У келажакда Ўзбекистон миллий терма жамоасига жалб этилиши мумкин. Бу ҳақда Eurasia Football нашрига таяниб, Sports.kz хабар берди.

Маълумотларга кўра, Толстеневнинг оиласи бир йил аввал Ўзбекистонга кўчиб келган. Дарвозабон шу вақт давомида «Ғазалкент» клубида машғулотларда иштирок этган. Шундан сўнг ФИФА футболчини рўйхатдан ўтказишга рухсат берган.

Айни пайтда клуб бўйи 197 сантиметр бўлган дарвозабон учун Ўзбекистон паспортини расмийлаштириш ишларини олиб бормоқда. Толстенев келажакда Ўзбекистон терма жамоаси учун номзод сифатида кўрилмоқда.

Толстенев Москвадаги «Чертаново» академияси тарбияланувчиси ҳисобланади. У ёшликдаги футболчилик фаолиятининг катта қисмини ушбу академияда ўтказган. Кейинчалик дарвозабон ФШМда қисқа муддат бўлган, Москва «Спартак» клуби тизимида шуғулланган ва Костроманинг «Спартак» клуби ёшлар жамоасида ҳам қайд этилган. Жамоа тарқатиб юборилганидан кейин у Ўзбекистонга кўчиб келган.

Толстенев келаси ойда 18 ёшга тўлади. Унинг Ўзбекистон терма жамоасида ўйнаш имконияти эса фуқароликни расмийлаштириш ва терма жамоаларда иштирок этиш бўйича тегишли талабларга боғлиқ бўлади.