Мисрлик ҳужумчи Муҳаммад Салоҳ Европа клублари ўртасидаги учта асосий мусобақада ҳам гол уриб, голли узатма амалга оширган тарихдаги илк футболчига айланди.

15 октябрь куни Конференциялар лигаси умумий босқичининг 1-туридан ўрин олган КуПС (Финляндия) ва «Трабзонспор» (Туркия) ўртасидаги учрашувда туркияликлар 4:2 ҳисобида ғалаба қозонди. Мазкур баҳсда «Трабзонспор» сафида ҳаракат қилган Салоҳ 44-дақиқада гол урди ва самарали ҳаракатлари билан жамоасининг ғалабасига ҳисса қўшди.

Football Tweet нашрининг X ижтимоий тармоғида хабар беришича, мисрлик футболчи УЕФА Чемпионлар лигаси, Европа лигаси ва Конференциялар лигасида ҳам гол уриш, ҳам голли узатма беришга эришган биринчи футболчи бўлди.

Учрашувда «Трабзонспор» сафида Пол Онуачу 3-дақиқада ҳисобни очди. Салоҳ 44-дақиқада иккинчи голни урди, Жу эса 47-дақиқада фарқни янада оширди. У 90+1-дақиқада ўзининг иккинчи голини киритди. Финляндияликлар сафида Пеннанен (54) ва Энгвалль (90+6) гол уришга муваффақ бўлди.

Конференциялар лигасининг кейинги турида «Трабзонспор» 22 октябрь куни Шотландиянинг «Хартс» клубини қабул қилади.

Эслатиб ўтамиз, Конференциялар лигасининг амалдаги ғолиби — Англиянинг «Кристал Пэлас» клуби.