"France Football" журналисти Флоран Торшю 2000 йилда Лионель Мессининг “Барселона” академиясидаги илк кўрикларидан сўнг мураббийлар томонидан тайёрланган учта ҳисоботни эълон қилди. Икки нафар мутахассис аргентиналик футболчи билан шартнома имзолашни тавсия қилган бўлса, учинчиси унинг бўйи ва жисмоний кўрсаткичлари сабабли бунга қарши чиққан.

Ўша вақтда Месси 13 ёшда бўлиб, бўйи 142 сантиметрни ташкил этган. Биринчи мураббий унинг тенгдошларидан техник жиҳатдан устунлигини, шунингдек, майдонни кўра билиши, чаққонлиги, ўйин интеллекти, дриблинги ва зарба бериш кучини алоҳида таъкидлаган.

Иккинчи мутахассис ҳам аргентиналик футболчининг техник маҳоратини эътироф этган, бироқ унинг жисмоний имкониятлари чекланганини жиддий тўсиқ деб ҳисоблаган.

«Унинг техник маҳорати шубҳасиз, аммо жисмоний имкониятлари жуда чекланган ва бу унга рақобатлашишда халақит беради. Менимча, у билан шартнома имзоламаслик керак. Унинг ривожланишини кузатиб бориш ва бир неча йилдан кейин яна кўрикдан ўтказиш лозим», — деб ёзган мураббий.

Учинчи ҳисоботда эса Мессига анча юқори баҳо берилган.

«Барча шубҳа ва эътирозларга қарамай, у — ёш Марадона. Мен у билан шартнома имзолаган бўлардим, чунки у анча юқори натижаларга эриша олади. Унинг қандай ривожланишини кўрамиз», — дея қайд этган мутахассис.

Бир неча ой ўтгач, “Барселона” барибир Месси билан шартнома имзолади. Кейинчалик аргентиналик футболчи жаҳон футболи афсонасига айланди.