"France Football" jurnalisti Floran Torshyu 2000 yilda Lionel Messining “Barselona” akademiyasidagi ilk ko‘riklaridan so‘ng murabbiylar tomonidan tayyorlangan uchta hisobotni e’lon qildi. Ikki nafar mutaxassis argentinalik futbolchi bilan shartnoma imzolashni tavsiya qilgan bo‘lsa, uchinchisi uning bo‘yi va jismoniy ko‘rsatkichlari sababli bunga qarshi chiqqan.
O‘sha vaqtda Messi 13 yoshda bo‘lib, bo‘yi 142 santimetrni tashkil etgan. Birinchi murabbiy uning tengdoshlaridan texnik jihatdan ustunligini, shuningdek, maydonni ko‘ra bilishi, chaqqonligi, o‘yin intellekti, driblingi va zarba berish kuchini alohida ta’kidlagan.
Ikkinchi mutaxassis ham argentinalik futbolchining texnik mahoratini e’tirof etgan, biroq uning jismoniy imkoniyatlari cheklanganini jiddiy to‘siq deb hisoblagan.
«Uning texnik mahorati shubhasiz, ammo jismoniy imkoniyatlari juda cheklangan va bu unga raqobatlashishda xalaqit beradi. Menimcha, u bilan shartnoma imzolamaslik kerak. Uning rivojlanishini kuzatib borish va bir necha yildan keyin yana ko‘rikdan o‘tkazish lozim», — deb yozgan murabbiy.
Uchinchi hisobotda esa Messiga ancha yuqori baho berilgan.
«Barcha shubha va e’tirozlarga qaramay, u — yosh Maradona. Men u bilan shartnoma imzolagan bo‘lardim, chunki u ancha yuqori natijalarga erisha oladi. Uning qanday rivojlanishini ko‘ramiz», — deya qayd etgan mutaxassis.
Bir necha oy o‘tgach, “Barselona” baribir Messi bilan shartnoma imzoladi. Keyinchalik argentinalik futbolchi jahon futboli afsonasiga aylandi.
