Испания қироллик футбол федерацияси (RFEF) Интизом қўмитаси Мадриднинг «Реал» клуби томонидан Ибраима Конатега кўрсатилган сариқ карточка юзасидан берилган апелляцияни қаноатлантирди.

Франциялик ҳимоячи Испания Ла Лигасининг 10-туридан ўрин олган «Вильярреал»га қарши учрашувда (1:0) огоҳлантирилган эди.

Баҳснинг 81-дақиқасида бош ҳакам Исидро Диас де Мера Конатега сариқ карточка кўрсатган. Бироқ «Реал» раҳбарияти ушбу қарорга эътироз билдириб, расмий шикоят билан мурожаат қилган.

Интизом қўмитаси мадридликларнинг апелляциясини қаноатлантирди ва ҳимоячига берилган огоҳлантиришни бекор қилди.

Шу тариқа, Конатенинг жорий мавсумдаги сариқ карточкалари сони учталигича қолди.

Агар «Вильярреал»га қарши баҳсдаги огоҳлантириш ўз кучида қолганида, бу франциялик футболчи учун мавсумдаги тўртинчи сариқ карточка бўларди.

Бундай вазиятда «Севилья»га қарши 9-тур учрашувида яна бир марта огоҳлантирилиши Конатенинг дисквалификация қилинишига ва «Эль-Класико»ни ўтказиб юборишига сабаб бўлиши мумкин эди.

Эндиликда мазкур сариқ карточканинг бекор қилиниши «Реал» ҳимоячисининг дисквалификация хавфини камайтирди.